Santiago, 07.12.2023.-    Volve a Liga de fútbol á Radio Galega tras tres días intensos de competición copeira. O venres festivo, desde as 20:30 h, o ‘Galicia en Goles’ analizará a xornada escoitando os principais protagonistas. Ademais, resumirá a primeira xornada da Copa das Rexións UEFA, en que Galicia debuta en Vigo ante Canarias.

O sábado, desde as 15:00 h, a axenda de retransmisións comeza en Oira co derbi entre o Ourense C. F. e o Pontevedra, da Segunda RFEF. Logo chegará o partido máis destacado do día, o Celta Fortuna-Cultural Leonesa, da Primeira RFEF, en Balaídos. O baloncesto, mentres, será protagonista nas plataformas dixitais radiogalega.gal e g24.gal/deportes coa Liga ACB, en que o Breogán visita a pista do Bilbao.

O domingo, a edición matinal comezará ás 11:45 h na FM co Galicia-Aragón, da Copa das Rexións UEFA, e as citas da Segunda RFEF Compostela-Oviedo Vetusta e Vilalbés-Guijuelo. O programa tamén conectará con radiogalega.gal e g24.gal/deportes, onde os oíntes poderán escoitar de xeito íntegro o Joventut-Obradoiro.

Pola tarde, desde as 15:00 h, o fútbol non terá parada con catro encontros consecutivos: Deportivo-Sestao, Lugo-Barcelona Atlético, Raio Majadahonda-Arenteiro e Huesca-Rácing de Ferrol.  No caso do encontro do Alcoraz, os seareiros terán ocasión de escoitar a narración de ‘Galicia en Goles’ no audio 2 da canle de televisión La Liga Hypermotion, que emite a través de diversos operadores. A partir das 23:00 h chegarán os especialistas de ‘Ao Contraataque’ para analizar os resultados e o xogo dos equipos galegos.

Para o fútbol galego, a xornada continuará o luns, co Raio Vallecano-Celta de Vigo, de Primeira División. A partir das 20:30 h, os seareiros poderán gozar doutro partido decisivo para o equipo olívico, ben a través da FM, radiogalega.gal, aplicación para o móbil ou, se seguen o partido pola televisión, polos audios do operador Gol Play.

#GaliciaEnXogo

O sábado, a Radio Galega emitirá varias entregas do proxecto #GaliciaEnXogo. Ás 13:00 h, Alfonso Pardo visita o concello de Piñor, lugar ideal para a práctica do sendeirismo, bicicleta de montaña e motos de campo.
    
Pola noite, de 23:00 a 00:00 h, compartirán protagonismo o motor e a información dos olímpicos que preparan os Xogos de París 2024.

Santiago, 04.12.2023.-  A película ‘O home e o can’, unha produción de Ézaro Films e Caladiño Filmes participada pola Televisión de Galicia, acaba de lograr o premio á mellor longametraxe Internacional no Ciberblue Films Festival de Vigo. Este é o décimo sexto galardón que obtén en festivais internacionais a cinta dirixida por Ángel de la Cruz, encargado de recoller este último recoñecemento.

Rodada integramente en galego e en branco e negro, a película aborda temas como a soidade non elixida, o envellecemento da poboación ou o abandono do rural. Protagonizada por Manuel Manquiña e Paula Chaves, conta tamén no elenco con actores como Gonzalo Uriarte, Isabel Blanco e Estíbaliz Veiga. Ademais, a banda sonora está composta e interpretada polo pianista ourensán Jaime Fernández Garrido. 

Segundo o seu director, ‘O home e o can’ é unha homenaxe ao neorrealismo italiano, que quere dar visibilidade a varios dos problemas da Galicia actual. Conta a historia de Manuel, un home coas súas capacidades intelectuais afectadas que non saíu nunca da aldea, onde vive completamente só tras a morte da última veciña. A única compaña que ten é a do seu inseparable can, ata que un accidente deste o obriga a marchar á cidade na busca dun veterinario. No medio deste caos, o protagonista atopará a Paula, quen foxe dun fogar desestruturado en busca de liberdade. Estes dous personaxes, aparentemente antagónicos, converteranse, sen agardalo, en amigos unidos pola soidade.